Pagpunan ng Puwang

      

 "Pagpunan ng Puwang" 

Sa patuloy na pag-usbong ng angking paa,
Kapaligira'y tahimik, liban sa ingay ng ulap na lumuluha.
Paragwas na nagsilbing panangga, sa kalangita'y nakatingala,
Pinagmamasdan, hinahangaan, gabing tila payapa.

Sa patuloy na pagyapak, isipa'y napuno ng katanungan,

Sa kung paanong tila sinusundan ng haring buwan.

Tahakang nababalot ng kamponang kadiliman,

Nagsilbing kaagapay, tagapagpalinaw ng magulong isipan. 

Sa ilalim ng luhanang ulap at bituing kislapin,

Nagbigay-daang repleksyunan ang sitwasyong daanin.

Piliing manatili, o piliing waksin,

'Di-angkop sa lipuna'y ninanais ng damdamin. 

Kahaharaping resulta'y 'di masukat ang bigat,

'Di maisipang ipagpalit, puso higit sa katiyakang panlahat

Pagpiling manatili'y 'di maisipang maisulat

Sapagkat sa reyalidad ng buhay ay nararapat na mamulat.

Ang bawat daliri sa kamay ay makikitaan ng pagitan

Mula hintuturo't hinlalaki, tila may puwang na nakalaan.

Sa takot at kaba, daaning sitwasyo'y winaksan,

Pagitan sa bawat daliri'y, sariling kamay ang hahagkan.

                                                                                                              - Atsu